Мәжіліс Төрағасы Нұрлан Нығматулин көші-қон саласындағы ынтымақтастық туралы Қазақстан-Қырғыз келісімі екі мемлекет президенттерінің уағдаластықтарын іс жүзінде жүзеге асыруға ықпал ететініне сенім білдірді, бұл туралы “ҚазАқпарат” ХАА ҚР Парламенті төменгі палатасының баспасөз қызметіне сілтеме жасап хабарлайды.
Тиісті келісімді ратификациялау туралы заң жобасы бүгін Мәжілістің жалпы отырысында мақұлданды. “Бір апта бұрын Қырғыз Республикасының Президенті елімізге мемлекеттік сапармен келді. Сол кезде екі мемлекет басшылары “екі елдің аумағы бойынша азаматтар мен көлік құралдарының еркін қозғалысы мен транзиті үшін келісілген шаралар қабылдаудың маңыздылығын”атап өтті. Біз жақында ғана мақұлдаған бұл келісім екі президенттің уағдаластықтарының іс жүзінде жүзеге асырылуын заңнамалық тұрғыдан қамтамасыз етеді”, – деп сенім білдірді Мәжіліс Спикері. Сонымен қатар, Нұрлан Нығматулин келісімнің қолданысынан нақты нәтижелерге қол жеткізудің маңыздылығын атап өтті: заңсыз көші-қон деңгейін төмендету, көші-қон заңнамасы саласындағы құқық бұзушылықтардың алдын алу, соның ішінде жедел ақпарат алмасу, сондай-ақ қос азаматтық фактілерінің жолын кесу бойынша бірлескен жұмысты күшейту.
