Палата Спикері Нұрлан Нығматулиннің төрағалығымен Мәжіліс Бюросының отырысы өтіп, онда депутаттардың алдағы жалпы отырысының күн тәртібінің жобасы әзірленді, деп zakon.kz хабарлады.
Палатаға “2021-2023 жылдарға арналған республикалық бюджет туралы”Заңға түзетулерді қарау ұсынылады.
Заң жобасы 2021-2025 жылдарға арналған макроэкономикалық көрсеткіштердің болжамын нақтылауға байланысты әзірленді және “Nur Otan” партиясының сайлауалды бағдарламасының іс-шараларын, Мемлекет басшысының Қазақстан халқына Жолдауында берген тапсырмаларын, сондай-ақ коронавирустық инфекциямен күрес жөніндегі іс-шараларды іске асыруға бағытталған.
Депутаттардың талқылауына ілеспе заң жобасымен “Қазақстан Республикасындағы сайлау туралы” Конституциялық заңға конституциялық түзетулер жобасы енгізіледі.
Заң жобалары Мемлекет басшысының аудандық маңызы бар қалалар, ауылдар, кенттер, ауылдық округтер әкімдерінің тікелей сайлауын енгізу туралы тапсырмасын орындау шеңберінде әзірленді. Бұдан басқа, Мәжіліске сайлау кезінде саяси партиялардың өту шегін 7% – дан 5% – ға дейін төмендету, сондай-ақ барлық деңгейдегі сайлау бюллетеньдерінің нысандарына жаңа бағанды енгізу бөлігінде өзгерістер енгізу көзделеді.
Алдағы жалпы отырыста палатаға Мәжіліске келіп түскен жаңа ратификациялық заң жобасы — заттар мен материалдардың құрамы мен қасиеттерінің стандартты үлгілерін жасау және қолдану жөніндегі ынтымақтастық туралы келісім бойынша қорытынды дайындау мерзімін айқындау ұсынылады.
