Nur Otan басқарушы партиясы төрағасының орынбасары Бауыржан Байбек Jastar-Otanga республикалық жастар лагеріне қатысушылармен кездесті. Бұл туралы партияның баспасөз қызметі хабарлады.
Кездесу барысында Қазақстан жастары үшін әлеуметтік лифт құру, жұмысқа орналасу, жатақханалардың жетіспеушілігі, сондай-ақ білім беру саласындағы сыбайлас жемқорлыққа қарсы іс-қимыл мәселелері қаралды.
Бауыржан Байбек барлық қатысушыларға Nur Otan партиясын қайта ретке келтіру бағдарламасының негізгі бағыттары туралы айтты.
«Nur Otan-тәулік бойғы түсінік. Сен тек 9:00-ден 18:00-ге дейін ғана нұротандық бола аламайсың.Ал бізде бүгін бір мәселені,ертең басқаны сөз ететін кейбір депутаттар бар.Лауазымына байланысты. Мұндай нұротандықтар бізге қажет емес. Олар адамдарға көмектесу, елге көмектесу үшін емес,Олар лауазымды иеленіп,өз мәселелерін шешу үшін отырады. Міне, соларды анықтап, партия катарын тазалау керек. Нұротандықтар елді өзгертіп, оны жақсартқысы келетін адамдар болуы тиіс.Бұған дейін,алдағы мәслихат сайлауында айтып өткенімдей Nur Otan партиясы ол үшін ашық және қатаң праймериз өткізетін болады», — деді Байбек.
Төраға орынбасарының айтуынша,Қазақстанның Тұңғыш Президенті Нұрсұлтан Назарбаевтың бастамасымен Nur Otan-ды қайта ретке келтіру бағдарламасы аясында еліміздің жастарын қолдау партия қызметінің негізгі бағыттарының бірі болады. Байбек партия Қасым-Жомарт Тоқаевтың Жолдауын жүзеге асыруға ерекше назар аударатынын атап өтті.
Zakon.kz
