Nur Otan партиясы төрағасының бірінші орынбасары Бауыржан Байбек Германия Бундестагы төрағасының орынбасары Ханс-Петер Фридрихпен кездесті.
Кездесу барысында партияаралық ынтымақтастықты дамытуға қатысты мәселелерді қарастырды. Сондай-ақ, тараптар Nur Otan партиясын”қайта реттеудің” негізгі бағыттарын талқылады.
Германия Бундестагының Вице-спикері бүгінгі таңда оның елі мен Қазақстан арасында сауда-экономикалық және мәдени-гуманитарлық ынтымақтастық қарқынды дамып келе жатқанын айтты.
Сонымен қатар, Ханс-Петер Фридрих өткен жылы екі ел арасындағы тауар айналымы 5,9%-ға өсіп, 5,1 миллиард еуроны құрағанын атап өтті. Оның айтуынша, біздің еліміз Германияның Орталық Азиядағы негізгі серіктесі болып табылады.
“70 жыл бойы Германияның саяси жүйесінде тұрақтылық орнады. Біз үлкен экономикалық табыстарға қол жеткізе алдық. Бірақ уақыт өзгереді,қазір біздің федералдық жиналыста 6 фракция бар. Біз саяси тұрақтылықтың арқасында 30 жылға жуық уақыт ішінде Қазақстан күшті көтерілгенін көріп отырмыз. Адамдар тұрақтылық үлкен құндылық екенін түсінуі тиіс, себебі ол экономикаға тірек болып табылады.Біз бұған әлі ораламыз деп үміттенемін.
Жалпы, тез дамып келе жатқан әлем жағдайында біздің алдымызда жаңа сын-қатерлер пайда болуда. Мысалы, технологиялардың дамуына байланысты сандық салада құқықтық тәртіп, мораль мен этиканы қамтамасыз етіп, дәстүрлі құндылықтарды ілгерілету қажет”, – деді Ханс-Петер Фридрих.
Сурет: Inform.kz
