Nur Otan жанындағы Құқықтық кеңестің отырысында қылмыстық сот ісін жүргізудің жаңа үш буынды моделін енгізу жөніндегі заң жобасы талқыланды.
Партияның баспасөз қызметінде атап өткендей, кеңестің бірінші кезектегі міндеті – “әділ құқық қорғау жүйесі” бағыты бойынша сайлауалды уәделердің іске асырылуын бақылау, оның ішінде заң жобалары мен қолданыстағы заңнаманы жетілдіру бойынша ұсынымдар әзірлеу. Елбасы, Партия Көшбасшысы Нұрсұлтан Назарбаевтың тапсырмасы бойынша 2025 жылға дейінгі тиісті жол картасы әзірленді.
Осылайша, Бас Прокурордың бірінші орынбасары Берік Асылов енді жаңа үш буынды модель аясында басты процестік шешімдерді адамды күдікті деп тану, іс-әрекеттің саралануын айқындау және басқалар ретінде прокурор қабылдайтынын айтты. Сонымен қатар, қазір тергеушілердің орнына прокурорларға айыптау актісін жасау ұсынылады.
Өз кезегінде Кеңес мүшесі Қайырбек Сүлейменов өкілеттіктерді қайта бөлуге байланысты прокуратура органдарына жүктеменің артып келе жатқанына назар аударып, алдымен айыптау актісін жасауды тек ауыр және аса ауыр қылмыстар бойынша беруді ұсынды.
Құқықтық кеңестің төрағасы, Парламент Мәжілісінің депутаты Қанат Мусиннің пікірінше, қылмыстық сот ісін жүргізудің жаңа моделі сот төрелігін іске асырудың парадигмасын түбегейлі өзгертеді.
Қазақстан бүгінде азаматтардың конституциялық құқықтары мен бостандықтарын қорғау, сот төрелігінің қолжетімділігі мен ашықтығын қамтамасыз ету, сондай-ақ ЭЫДҰ елдерінің жоғары стандарттарын енгізу және әлемнің дамыған 30 елінің қатарына кіру бейілділігін растау үшін өзінің қылмыстық іс жүргізу заңнамасын жетілдіруде. Бүгінде ЭЫДҰ – ның жетекші елдерінің тәжірибесі ішкі істер органдарының, прокуратура мен соттың өзара іс-қимылының классикалық моделі қандай болуға тиіс екенін көрсетіп отыр. Қылмыстық қудалау органдары, прокуратура және сот арасындағы сотқа дейінгі тергеу сатысындағы өзара іс – қимыл тиімді жұмыс пен азаматтардың конституциялық құқықтары мен бостандықтарын қорғауды қамтамасыз етеді, – деп түйіндеді Қанат Мусин.
Естеріңізге сала кетейік, өткен жылдың 1 қыркүйегінде Мемлекет Басшысы Қасым-Жомарт Тоқаев Қазақстан халқына Жолдауында полиция, прокуратура және сот арасында өкілеттіктерді нақты бөле отырып, сот төрелігінің үш буынды моделін енгізуді тапсырған болатын.
