Бундестаг Халықаралық істер комитетінің парламенттік хатшысы Андреас Ян Неміс парламентінде Қазақстан президенті Қасым-Жомарт Тоқаевтың БҰҰ-ның 74-ші бас ассамблеясында сөйлеген сөзін талқылағанын хабарлады.
Оның айтуынша, Қасым-Жомарт Тоқаев БҰҰ бас ассамблеясында ядролық қаруды қолдануға тыйым салу мәселесіне назар аударды.
Андреас Ян біздің президентіміз өз сөзінде бүкіл әлемдік қауымдастық үшін өзекті күн тәртібін белгіледі деп санайды.
«Президент Тоқаев Қазақстанның басты басымдығы — ядролық қарудан азат әлемге қол жеткізу екенін айтты. Бүгін әлемге жаңа қару-жарақ жарысы қауіп төндіруде. Сондықтан біз БҰҰ-да Президент айтқан бастамаларды ерекше қолдаймыз», — деді неміс парламентінің мүшесі.
Сонымен қатар, халықаралық істер жөніндегі Бундестаг комитетінің парламенттік хатшысы бүгінгі таңда біздің еліміз бейбіт келіссөздердің орталығы болып табылатынын атап өтті.
«Сіз әлемдегі тұрақтылық пен қауіпсіздікке үлкен үлес қосудасыз. Сонымен қатар, Президент Тоқаев климат өзгеруінің салдары туралы айтты. Бұл өте маңызды мәселе. Бізде, Бундестагта, климатты қорғау туралы заң дауыс берудің соңғы сатысында. Ол қазан айында қабылданады деп үміттенеміз», — деді Андреас Ян.
Сурет: 24.kz
