Германияның Қазақстандағы төтенше және өкілетті елшісі Тило Клиннер бастаған сол елдің кәсіпкерлерінің делегациясы Шығыс Қазақстан облысына барып, аймақ әкімі Даниал Ахметовпен кездесті.
Келіссөз барысында жоғарыда аталған делегацияның Шығыс Қазақстанға сапарының қорытындысына қатысты мәселелерге назар аударылды. Атап айтқанда, Германия өкілдері сапары шеңберінде өңірдің инвестициялық әлеуетімен және «Қазмырыш» ЖШС және «ҮМЗ» АҚ қызметімен танысты.
«Бүгін сіздер ынтымақтасуға болатын бағыттар туралы толық ақпарат алды деп үміттенемін.Сіздермен бірлесе атқаратын жұмыс және жұмыс тобын құру туралы талқыладық. Сондықтан біз ауыл шаруашылығы, білім беру, денсаулық сақтау және туризм салаларындағы ынтымақтастық туралы ұсыныс хатын жолдадық», — деді Шығыс Қазақстан облысының әкімі.
Сондай-ақ кездесуде Шығыс Қазақстан мен Германия Федеративтік Республикасы арасындағы байыту фабрикаларының қалдықтарын өңдеу саласындағы өзара іс-әрекетті дамытуға қатысты мәселелер қаралды.
«Мен соңғы хатымда осы салаға сараптамалық білімді тарту мүмкіндігі туралы айттым. Бізде Фридберг қаласындағы университет осы мәселемен айналысады. Алдағы уақытта біз сіздердің Серікбаев атындағы ШҚМТУ-мен бірлесе атқаратын жұмысты талқылаймыз. Бұл тұрғыда бізде үлкен әлеует бар. Біз байыту фабрикаларының қалдықтарын қайта өңдеу туралы сөйлесіп, жедел тұжырымдама әзірлейміз», — деді неміс дипломаты.
Сурет: Inform.kz
