ҚР Сыртқы істер министрлігінің ресми өкілі Айбек Смадияровтың хабарлауынша, Үндістанда ҚР-ның 68 азаматы кідіріп қалып, барлығы үш жүзге жуық жолаушы ұшып кете алмады.
Үнді-Пәкістан әскери қақтығысы салдарынан ұшып кете алмаған қазақстандық азаматтар елге оралды.
“Эйр Астана” әуекомпаниясының рейстері бүгінгі күннен бастап қалыпты режимде жұмыс істейді. Кеше, жексенбі күні қалған жолаушылар Делиден ұшырылды. Бүгін кестеге сәйкес Алматы мен Астанаға тағы екі рейс ұшырылады.
Үндістанда демалып жатқан бір де бір қазақстандық турист мерзімінен бұрын кеткен жоқ.
1 наурызда Үндістандағы ҚР Елшісі Болат Сәрсенбаев 304 жолаушы Дели әуежайынан ҚР-ға ұшуды күтіп отырғанын хабарлады. “Эйр Астана” рейстері Пәкістан әуе кеңістігінің барлық халықаралық ұшулар үшін жабық болуы себебінен кідірді немесе кестесі өзгертілді.
Үндістанға және кері рейстер, Оман Корольдігінде қосымша жанармай құю үшін, баламалы бағыт бойынша орындалады.
Сурет: informburo.kz
