Қазақстан Республикасының Тұңғыш Президенті Нұрсұлтан Назарбаев «Самұрық-Қазына» ұлттық әл-ауқат қорын басқару кеңесінің отырысын өткізді, деп хабарлайды Қазақстанның Тұңғыш Президентінің баспасөз қызметі.
Отырысқа премьер-министр Асқар Мамин, Президент Әкімшілігінің басшысы Бақытжан Сағынтаев, «Самұрық-Қазына» АҚ Басқарма Төрағасы Ахметжан Есімов, «Самұрық-Қазына» АҚ тәуелсіз директоры Ричард Эванс, Тұңғыш Президенттің көмекшісі Данияр Ақышев, сондай-ақ басқарма мүшелері мен Қордың ұлттық компанияларының басшылары қатысты.
Отырыс барысында Назарбаев «Самұрық-Қазына» АҚ 2018-2028 жылдарға арналған даму жоспарымен таныстырылды, сондай-ақ қорды одан әрі трансформациялау бойынша тапсырмалардың орындалу барысы туралы хабардар етті.
«Қор ел экономикасында маңызды рөл атқарады. Біз озық халықаралық тәжірибені зерделеп барып оны құрдық. Бүгінде» Самұрық-Қазына» Қоры елдің дамуына елеулі үлес қосып келеді», – деді Нұрсұлтан Назарбаев.
Сондай-ақ, Қазақстанның Тұңғыш Президентін Қор компанияларын жекешелендіру, индустриялық-инновациялық даму және «Нұрлы жол»бағдарламаларын жүзеге асыру кезеңдерімен таныстырды.
Бұдан басқа, «Самұрық-Қазына» АҚ Басқарма төрағасы «қор портфелін әртараптандыру мақсатында біз егеменді қорлармен және халықаралық инвесторлармен стратегиялық серіктестік мүмкіндіктерін қарастырамыз» деп мәлімдеді.
Отырыс барысында Эванс, Мамин және ұлттық компаниялардың басшылары баяндама жасады. Бұдан кейін Назарбаев Ұлттық әл-ауқат қорының жұмысын жеке өзі бақылайтынын айтты.
«Қордың басты міндеті — активтерді көбейту, кірістерді арттыру және ұлттық компанияларды дамыту. Қордың активтері ел экономикасы үшін стратегиялық мәнге ие. Жаңа басшылық жұмысының оң нәтижелерін атап өткім келеді. Қысқа уақыт ішінде қарыз жүктемесін айтарлықтай төмендетуге, компаниялардың кірістілігін арттыруға, қаржы құралдарын басқарудың тиімділігін қамтамасыз етуге қол жеткізілді», – деді Назарбаев.
Бұдан басқа, Назарбаев адамдар компанияның басты активі болып табылатынын атап өтті.
«Адамдар — компаниялар мен кәсіпорындардың басты активі. Жұмысқа қабылдау процедуралары ашық болуы маңызды. Барлық тағайындаулар транспарентті болуы тиіс», — деді Назарбаев.
Отырыс соңында Нұрсұлтан Назарбаев Қордың ағымдағы жылғы жұмысының нәтижесін жоғары бағалады, сондай-ақ Қордың қаржылық жағдайын одан әрі жақсартуға бағытталған бірқатар міндеттерді тапсырды.
Сурет: tengrinews.kz
