Қазақстанның Тұңғыш Президенті Нұрсұлтан Назарбаев пен еліміздің қазіргі басшысы Қасым-Жомарт Тоқаев қазақстандық тележүргізуші Нұртілеу Иманғалиұлының отбасына көңіл айтты. Бұл туралы Sputnik жаңалықтар порталы хабарлады.
Тоқаев өзінің жеделхатында тележүргізушіні Қазақстанның телевизиялық журналистикасында із қалдырған адам деп атады.
«Ол көп жылдар бойы шығармашылық салада жемісті еңбек етіп, халқымыздың рухани-мәдени байлығының дамуына зор үлес қосты», — деп жазды мемлекет басшысы.
Елбасы өз кезегінде Иманғалиұлының өз өмірін отандық телевизияны дамытуға арнағанын, сондай-ақ Тәуелсіз Қазақстанның тележурналистикасын дамытуға зор үлес қосқанын атап өтті.
«Ол тілшіден «Қазақстан» Ұлттық телеарнасының басқарма төрағасына дейінгі жолдан өткен өз ісінің нағыз маманы еді. Оның көкейтесті әлеуметтік мәселелерге арналған авторлық бағдарламалары халық жадында мәңгі сақталады», — деп жазды Назарбаев.
Бүгін 70 жасында қазақстандық журналист Нұртілеу Иманғалиұлы қайтыс болды. Ол отандық теледидарда 45 жыл жұмыс істеді.
Сурет: almaty.tv
