Ташкенттегі екінші консультативтік кездесуде делегациялар басшылары Нұрсұлтан Назарбаевқа Орталық Азия мемлекеттері басшыларының консультативтік кездесуінің құрметті төрағасы мәртебесін беру туралы шешім қабылдады, деп ХАА “ҚазАқпарат” хабарлайды.
Бұл туралы ҚР Тұңғыш Президентінің баспасөз хатшысы Айдос Үкібай Twitter-де хабарлады.
Бұған дейін хабарланғандай, Орталық Азия мемлекеттері басшыларының екінші Консультативтік кездесуі Ташкентте өтіп жатыр.
Келіссөздерге Қырғызстан, Тәжікстан, Түрікменстан және Өзбекстан президенттері, сондай – ақ ҚР Тұңғыш Президенті-Елбасы Нұрсұлтан Назарбаев қатысты. Орталық Азия елдері көшбасшыларының консультативтік кездесуін РУ Президенті Шавкат Мирзиеев ашты.
Кездесу күні тәртібінде – өңірлік саясат, сауда-экономикалық, инвестициялық, көлік-коммуникация салаларындағы ынтымақтастық, ғылыми-техникалық және гуманитарлық алмасу, сондай-ақ ОА-да қауіпсіздікті қамтамасыз ету мәселелері қаралды.
Алғашқы консультативтік кездесу 2018 жылы Қазақстанда өтті.
Н.Назарбаев Ташкентке жақында келді. Ресми сәлемдесу рәсімінен кейін Нұрсұлтан Назарбаев пен Шавкат Мирзиеевтің тет-а-тет форматында кездесуі өтті.
