Елбасы Нұрсұлтан Назарбаев Түркия Республикасының Сыртқы істер министрі Мевлют Чавушоглумен кездесті, деп хабарлайды Қазақстанның Тұңғыш Президентінің баспасөз қызметі.
Кездесу барысында Қазақстанның Тұңғыш Президенті бауырлас екі ел арасындағы ынтымақтастықты сақтау мен одан әрі тереңдетудің маңыздылығын атап өтті.
“Тәуелсіздіктің алғашқы күнінен бастап Түркия бізді әрдайым қолдады. Біздің елдеріміз бен халықтарымыз бір-біріне өте жақын. Біз екі ел арасында визасыз режим енгіздік. Қазақстан мен Түркия қарым-қатынасы жылдан жылға нығайып келеді. Бұл курс жалғасын табатынына сенімдімін”, – деді Елбасы.
Нұрсұлтан Назарбаев сондай-ақ Түркі кеңесі аясындағы мемлекетаралық байланысты дамыту қажеттігін атап өтті.
“Түркі тілдес мемлекеттердің ынтымақтастық кеңесі Түркі халықтары арасындағы байланыстарды дамыту және нығайту мақсатында құрылды. Бұл жұмысты жалғастыру керек. Мен жан-жақты қолдау көрсетемін”, – деді Қазақстанның Тұңғыш Президенті.
Өз кезегінде Чавушоглу Президент Реджеп Ердоғанның атынан Нұрсұлтан Назарбаевты жақын арада Түркияға шақырды.
“Біз Елбасы, Қауіпсіздік Кеңесінің төрағасы, “NurOtan” партиясының басшысы ретінде Қазақстан халқының игілігі үшін белсенді жұмыс істеуді жалғастыратыныңызды қолдаймыз. Бізге еліміздің өркендеуі мен екіжақты қарым-қатынастардың дамуы үшін зор еңбек еткеніңіз жақсы мәлім”, – деп атап өтті Түркия Республикасының Сыртқы істер министрі.
Әңгіме барысында тараптар халықаралық және өңірлік күн тәртібіндегі өзекті мәселелерді талқылады.
Кездесу соңында Түркия Республикасының СІМ басшысы Түркі кеңесі мемлекеттері көшбасшыларының қабылданған шешіміне сәйкес Түркі әлемі елдерінің дамуына қосқан елеулі үлесі үшін Нұрсұлтан Назарбаевқа түркі тілдес мемлекеттер ынтымақтастығы кеңесінің құрметті төрағасы өмірлік мәртебесі берілгенін хабарлады.
