Қазақстан астанасында мұнай-газ өнеркәсібі инженерлері қоғамының (SPE) симпозиумы өтті. Іс-шара барысында еңбекті қорғау, өнеркәсіптік қауіпсіздік, Каспий өңіріндегі әлеуметтік жауапкершілік, сондай-ақ қоршаған ортаны қорғау мәселелері талқыланды. Симпозиумды ұйымдастырушы “ҚазМұнайГаз” ҰК ” АҚ. Іс-шара Kazakhstan Energy Week 2019 аясында өтті.
Симпозиумға Каспий өңірінің аумағында орналасқан мұнай-газ компанияларының үш жүзге жуық өкілдері, сондай-ақ осы саладағы әлемдік сарапшылар қатысты. Олардың ішінде SPE техникалық директоры Йохан Данлоп, экология, геология және табиғи ресурстар министрі Мағзум Мырзағалиев, “ҚазМұнайГаз” Басқармасының Төрағасы Алик Айдарбаев, NCOC басқарушы директоры Ричард Хоув, KAZENERGY бас директоры Болат Ақшолақов және мұнай және газ өндірушілерінің Халықаралық қауымдастығының қауіпсіздік жөніндегі директоры Олав Скар болды.
Талқылаудың басты тақырыбы Каспийдің табиғи ресурстарын дұрыс пайдалану, сондай-ақ экологиялық және әлеуметтік жауапкершілік болды. Симпозиумға қатысушылар өздерінің өндірістік салаға инновацияларды енгізу тәжірибесі туралы әңгімеледі.
“ҚазМұнайГаз өндірістік қауіпсіздіктің жоғары стандарттарына сәйкес келуге ұмтылады,біз бұл мәдениеттің нығаюы мен өсуі үшін барлығын жасаймыз. Соңғы 5 жылда біз өнеркәсіптік қауіпсіздік және еңбекті қорғау саласындағы прогреске қол жеткіздік. Біз өз мақсатымыз – 100%-дық қауіпсіздікке жету жолында үздіксіз жұмыс істейміз”, – деп атап өтті “ҚазМұнайГаз” Басқармасының Төрағасы Алик Айдарбаев.
Сурет: kaznews.kz
