Нұр-Сұлтанда Полиция күні қарсаңында қызмет кезінде қаза болған Ішкі істер органдарының қызметкерлері мен Ұлттық ұланның әскери қызметкерлері монументіне гүл шоқтарын қойды, деп хабарлайды ведомствоның баспасөз қызметі.
Салтанатты рәсімге ҚР Ішкі істер министрлігінің басшысы Ерлан Тұрғымбаев, орталық аппараттың басшылары, ішкі істер органдарының және Ұлттық гвардия зейнеткерлері мен, шақырылған қонақтар, ІІМ оқу орындарының түлектерінің ата-аналары қатысты.
“Қатысушылар қызметтік борышын өтеу кезінде қаза тапқан ішкі істер органдарының қызметкерлері мен ішкі әскерлердің әскери қызметшілерін еске алды. Тәуелсіздік жылдарында 787 полиция қызметкері қызметтік міндеттерін атқару кезінде қаза тапты, 3513 жарақат алды. Ішкі істер министрі Ерлан Тұрғымбаев ҚР ІІМ оқу орындарының түлектеріне лейтенант погондарын салтанатты түрде табыс етті.Одан кейін елордалық полиция гарнизонының және ҚР Ұлттық гвардиясының салтанатты шеруі өтті”, – делінген хабарламада.
2019 жылы үздіктер арасынан 20 курсант алғашқы лейтенант атағын алды.
Гүл шоқтарын қою рәсімінен кейін, ІІМ клубында салтанатты жиын өтті. Онда Ерлан Тұрғымбаев ІІБ қызметкерлерін кәсіби мерекесімен құттықтап, жұмыста табыс тіледі.
“Министрдің бұйрығымен бірқатар ішкі істер органдарының қызметкерлері “Құқық тәртібін қамтамасыз етуге қосқан үлесі үшін” медалімен марапатталды. Сондай-ақ министр қызметте ерекше көзге түскен қызметкерлерге құрмет грамоталары мен мерзімінен бұрын атақтар тапсырды. ІІМ бұйрығымен қызметтік міндеттерін адал орындағаны үшін және полиция күнін мерекелеуге байланысты ішкі істер органдарының 697 қызметкері марапатталды”, – деп хабарлады ведомствода.
