Нұр-Сұлтан қаласының тәртіп сақшылары жедел-іздестіру іс-шараларын жүргізу барысында бұрын сотталған адамды ұстады. Тінту кезінде тыйым салынған заттар – гашиш қосылған 13 полиэтилен пакет табылды. Бұл туралы nur.kz ақпарат агенттігі жазады.
Есірткі сатушы ұсталғаннан кейін, құқық қорғау органдарының қызметкерлері оның үйіне тінту жүргізді. Полиция онда тағы гашиш қосылған 32 оралған полиэтилен пакетті, сондай-ақ есірткіге ұқсас заты бар 3 пакетті тапты.
Ұсталғаннан барлығы 20 келіге жуық тыйым салынған заттар тәркіленді. Қара нарықта олардың құны 30 миллион теңгеден асады.
Есірткі сатушыға қатысты бірнеше бап бойынша қылмыстық іс ашылды. Есірткі саудасынан басқа, ол қару-жарақ пен оқ-дәрілерді заңсыз сатып алды және сақтады деп күдікке ілінді. Мұндай әрекеттері үшін ол 10 жылдан 25 жылға дейін бас бостандығынан айырылуы мүмкін.
Қазіргі уақытта қылмыскер уақытша ұстау изоляторында. Осы уақытта құқық қорғау органдары есірткі сатушының көмекшілері бар-жоғын анықтауға тырысуда.
Сурет: m.fishki.net
