Нұр-Сұлтан басшысы бизнес өкілдері және елорданың санитарлық дәрігерлерімен кездесу өткізгенін айтты.
Елорда әкімі Алтай Көлгінов Нұр-Сұлтан кәсіпкерлері кинотеатрлар мен қонақ үйлер базасында COVID-19 вакцинациясы үшін егу пункттерін ашуды ұсынғанын хабарлады.
“Бүгін бизнес өкілдерімен, Нұр-Сұлтан кәсіпкерлер палатасымен, санитарлық дәрігерлермен шағын және орта бизнесті қолдау шаралары, егу пункттерін ашу, Ashyq жобасын кеңейту мәселелері талқыланды”, — деп жазды елорда әкімі әлеуметтік желілерде.
Ол вакцинаның бірінші кезеңінде қауіпті топтағы адамдар: медицина қызметкерлері, мұғалімдер, полиция және басқалар алуды жалғастыратынын еске салды. Әкімнің айтуынша, сәуір айынан бастап халықты жаппай вакцинациялау басталады. Президенттің тапсырмасына сәйкес, Денсаулық сақтау министрлігі “СК-Фармациямен” бірлесіп, халықты барынша қамту үшін қалаға вакциналардың қосымша дозаларын жеткізеді.
“Кәсіпкерлердің әлеуметтік жауапкершілік танытып, егу пункттерін көбейту үшін өз алаңдарын ұсынып отырғаны бізді қуантады. Мысалы, Нұрлан Смағұлов “Mega Silk Way”СОО кинотеатрын егу пункттеріне жабдықтауды ұсынды. Сондай-ақ, қонақ үй иелерінен ұсыныстар түсті”, – деп жазды қала басшысы.
Ол қаланың бас санитарлық дәрігеріне және басқармаларға вакцинация процесін жаппай және қала тұрғындары үшін ыңғайлы етіп ұйымдастыруға қажетті инфрақұрылымды дайындауды тапсырды.
Сондай-ақ, Алтай Көлгінов Ashyq жүйесі қағидаты бойынша жұмыс істей алатын нысандар тізімін көбейту жоспарланғанын айтты. Ол Президенттің тапсырмасы бойынша бейінді органдар бизнесті қолдаудың жекелеген салықтар мен несиелер бойынша төлемдерді кейінге қалдыру, салықтық және кедендік берешекті мәжбүрлеп өндіріп алуды тоқтата тұру сияқты қосымша шараларын қабылдау бойынша жұмыс жүргізіп жатқанын қоса айтты.
