Елордалық атқарушы билік органы бюджеттік бағдарламаны жүзеге асыруға 10 миллиард теңгеден астам қаржы бөлуді сұрайды, деп хабарлайды “ҚазТАГ” ақпараттық жүйесі.
Сөз “Мемлекет қажеттілігі үшін жер телімдерін алу, соның ішінде сатып алу” бюджеттік бағдарламасы туралы болып отыр.
Оның жобасында биылғы жылы бағдарламаны жүзеге асыруға 6 миллиардтан астам теңге, 2021 жылы – 2 миллиард теңге және 2022 жылы – 2 миллиард теңге қажет екені көрсетілген.
Биыл мемлекет мұқтажы үшін 482 учаскені, ал 2021 және 2022 жылдары – алты учаскеден алу жоспарланып отыр.
Бағдарлама жобасында көрсетілгендей, ақшалай қаражат алынатын жер телімдерінің иелеріне өтемақы төлеу үшін қажет.
Осы бюджеттік бағдарламаның әкімшісі қалалық тұрғын үй басқармасы мен тұрғын үй инспекциясы болып табылады.
Бұған дейін Нұр-Сұлтандағы Қоршаған ортаны қорғау және табиғатты пайдалану басқармасы Астанадағы флагшток аумағын қалпына келтіруге және абаттандыруға 1,4 миллиард теңге жұмсауға ниетті екені хабарланған. Бұл тапсырыс мемлекеттік сатып алу порталында орналастырылды.
