Қазақстанның Каирдегі төтенше және өкілетті елшісі Арман Исағалиев Египет бизнесмендерімен кездесу өткізді. Бұл туралы ҚР сыртқы саяси ведомствоның баспасөз қызметі хабарлады.
Кездесу барысында қазақстандық дипломат Мысыр кәсіпкерлеріне еліміздің әлеуметтік-экономикалық дамуының жетістіктері туралы әңгімеледі. Сондай-ақ, бизнесмендер Қазақстанның әлемнің дамыған 30 елінің қатарына кіруі бойынша Үкімет қабылдаған шаралар туралы хабардар болды.
Сонымен қатар, біздің елші Қазақстанның инвестициялық ахуалы мен шетелдік инвесторлар үшін елеулі жеңілдіктер мен преференциялар беретін заңнамасы туралы мәлімет берді.
Кездесу барысында таяу уақытта Египет бизнесмендері делегациясы Қазақстан кәсіпкерлерімен келіссөздер жүргізу үшін Алматы қаласына келуді жоспарлап отырғанын атап өтті. Тараптар инвестициялық және сауда-экономикалық ынтымақтастықты жолға қоюды қарастырады деп жоспарлануда.
