Қазақстанның Сыртқы істер министрлігінің баспасөз қызметі консулдық мәселелер бойынша Қазақстан-Моңғол консультациясының 9-шы раунды өткен туралы хабарлады.
Келіссөздерге екі елдің консулдық қызмет департаменттерінің, сыртқы саяси ведомстволардың, Бас прокуратураның, ІІМ, Әділет министрлігінің, Еңбек және білім министрлігінің өкілдері қатысты.
Олар азаматтар мен заңды тұлғалардың құқықтары мен мүдделерін қорғау, азаматтардың екі елдің аумағына келуі мен кетуі, оларды әлеуметтік қорғау мәселелерін талқылады. Сондай-ақ есірткі қылмыстылықпен күресті үйлестіру мәселелері талқыланды. Моңғолияда Баян-Өлгий аймағында қазақстандық консулдық пункттің ашылуына байланысты да келіссөздер жүргізілді.
Баспасөз қызметі атап өткендей, тараптар екі ел үкіметтері арасындағы азаматтық алу және оны тоқтату тәртібін өзара оңайлату туралы және азаматтығы жоқ және қос азаматтық жағдайларын болдырмау туралы келісім жобасын талқылады.
