Минскіде Қазақстан Республикасы мен Беларусь Республикасы Қауіпсіздік Кеңесінің аппараттары арасында кеңейтілген жоспарлы консультациялар өтті, деп ХАА «ҚазАқпарат» хабарлайды Ақорданың баспасөз қызметіне сілтеме жасай отырып.
Қазақстан Республикасы Президентінің көмекшісі – Қауіпсіздік Кеңесінің Хатшысы Қалмұханбет Қасымов пен Беларусь Республикасы Қауіпсіздік Кеңесінің Мемлекеттік хатшысы Станислав Зась төрағалық еткен келіссөздер барысында екі мемлекет ынтымақтастығының өзекті мәселелері талқыланды.
Тараптар өңірлік және жаһандық қауіпсіздік жағдайы бойынша пікір алмасты. Ақпараттық қауіпсіздік саласындағы заманауи сын-қатерлер мен қатерлер егжей-тегжейлі талқыланды, осы саладағы бағалармен және жинақталған тәжірибемен нәтижелі алмасу болды.
Екі елдің ақпараттық қауіпсіздігін қамтамасыз ету мақсатында әріптестік тиімділігін арттыру бойынша ұсыныстар бірлесіп әзірленді.
Сондай-ақ кеңес беру кезінде қорғаныс саласындағы халықаралық ынтымақтастықтың түрлі аспектілері, әскери-техникалық саладағы екіжақты өзара іс-қимылдың перспективалық бағыттары қаралды.
Бұдан басқа, С. Засяның ҰҚШҰ-ның Бас хатшысы қызметіне 2020 жылдың қаңтарынан бастап кіруін ескере отырып, Беларусьтің төрағалық ету шеңберінде аталған халықаралық ұйым қызметінің басым бағыттары қаралды.
Жұмыс қорытындысы бойынша екі елдің тиісті мемлекеттік органдарына нақты тапсырмалар берілді.
Қауіпсіздік кеңестерінің аппараттары арасындағы консультациялар қабылданған ынтымақтастық жоспарына сәйкес тұрақты негізде өтеді.
