Қазақстанның премьер-министрі Асқар Мамин үкіметтің кезекті отырысында республикадағы өнеркәсіп көрсеткіштерін жақсарту мәселелеріне назар аударды. Бұл туралы оның баспасөз қызметі хабарлайды.
Қазақстан үкіметі басшысы Тұңғыш Президент Нұрсұлтан Назарбаев Nur Otan басқарушы партиясы фракциясының кеңейтілген отырысында сөйлеген сөзінде экономиканың өсуін қамтамасыз етуге және елдің макроэкономикалық, әлеуметтік тұрақтылығын сақтауға тапсырма бергенін еске салды.
«Осыған байланысты өңірлер мен министрліктердің басшылары Елбасы мен ел Президенті айқындаған міндеттерді орындау бойынша жұмысты жандандыруы қажет. Жалпы, ел экономикасы тұрақты өсуде. ЖІӨ өсу қарқыны өткен жылдың осы кезеңімен салыстырғанда 4,4%-ды құрады», — деді Асқар Мамин.
Сонымен қатар, премьер-министр Қазақстан экономикасының өсу драйвері болып табылатын салаларды атап өтті. Оның айтуынша, құрылыс, сауда, көлік және өңдеу секторында, соның ішінде машина жасау, өнеркәсіп, түсті металл, мұнай өнімдері мен металл кендерін өндіруде өсім байқалуда.
«Салалық министрліктер мен өңірлердің басшыларына негізгі өнеркәсіптік көрсеткіштерді жақсарту бойынша жұмысты күшейтуді тапсырамын. Айта кетейік, 10 айдың қорытындысы бойынша экономика өсуінің негізгі базалық көрсеткіштерін жақсартуда Ақтөбе, ШҚО, Павлодар және СҚО әкімдіктері жақсы жұмыс атқарды. Сонымен қатар, бірқатар әкімдіктер бойынша көрсеткіштердің төмендеуі байқалады. Бұл Маңғыстау, Қызылорда, БҚО, Шымкент және Нұр-Сұлтан қалалары. Осыған байланысты көрсеткіштері төмен әкімдіктер жағдайды жақсарту бойынша түбегейлі шаралар қабылдауы қажет», — деп мәлімдеді министрлер кабинетінің басшысы.
