Қазақстан Республикасы Үкіметі басшысының орынбасары Ералы Тоғжанов өңірдегі эпидемиологиялық жағдайды тексеру үшін Атырау облысына жұмыс сапарымен барды, деп хабарлайды тауарлар мен қызметтердің сапасы мен қауіпсіздігін бақылау комитетінің баспасөз қызметі.
Өңірге сапары барысында вице-премьер “СҚ-Фармация ” ЖШС қоймаларында болып, медициналық мекемелерде қажетті дәрі-дәрмектердің жетімдылігін тексерді.
Тексеру қорытындысы бойынша облыстың барлық медициналық мекемелерінде дәрі-дәрмектердің негізгі түрлері бір айға, алайда дәрі-дәрмектердің басым сегіз түрі бойынша қор жеті күнге қана жетерлік.
“СҚ-Фармация” басшысы Ерхат Есқалиев бұл мәселені үш күнде шешуге дайын екенін мәлімдеді.
Атырау облысына сапарының соңында Ералы Тоғжанов “СҚ-Фармация” басшылығына және облыстық атқарушы билік органына дәрілердің тұрақты үш айлық қорын қамтамасыз ету жөнінде шаралар қабылдауды тапсырды.
Бүгінгі күні өңірде коронавирустық инфекцияны жұқтырудың 9866 жағдайы ресми түрде тіркелді, ал Қазақстанда олардың жалпы саны 80226 құрайды.
