Қыркүйек айының ортасында Қазақстан Коммунистік Халық партиясынан сайланған Мәжіліс депутаттары премьер-министр Асқар Маминнің атына депутаттық сауал жолдап, онда елімізде несиелік рақымшылық жасауды ұсынды.
Коммунистердің пікірінше, басшылық карантиндік шаралар енгізілгенге дейін үнемі төлеген, бірақ эпидемия мен карантиннің келуімен несиеге қызмет көрсету қиын жағдайға тап болған жеке және заңды тұлғаларға несие бойынша рақымшылық жасауы керек.
Кредиттік рақымшылық жасауға дайындалу мақсатында депутаттар рақымшылыққа қатысушылар үшін өлшемшарттарды, қаржыландыру мерзімдері мен көздерін айқындаумен айналысатын комиссия құруды ұсынды.
Бүгін атқарушы билік басшысы бұл депутаттық сауалға жауап берді. Асқар Мамин несиелік рақымшылық жүргізу барлық қарыздар бойынша міндеттемелердің жаппай орындалмауына алып келетінін, бұл өз кезегінде отандық банк жүйесінің қаржылық тұрақтылығына және қаржы институттарының клиенттер алдындағы міндеттемелерін орындауына қауіп төндіретінін айтты.
Сондықтан, министрлер кабинетінің басшысы республикада несиелік рақымшылық жасау туралы ұсынысты басшылық қолдамайтынын атап өтті.
Сурет: kazakh-tv.kz
