Жаңа өнеркәсіптік саясат шеңберінде «Бизнестің ыңғайласпа міндеттемелері» ұғымы енгізілетін болады. Бұл мемлекеттен қолдау алған, бірақ оны ұтымды пайдаланбаған кәсіпорындарға бөлінген қолдау қаражатын қайтаруға міндеттелетінін білдіреді. Бұл туралы ҚР Индустрия және инфрақұрылымдық даму министрлігінің Өнеркәсіптік саясат департаментінің директоры Лаура Садықова мәлімдеді, деп хабарлайды «ҚазАқпарат» ХАА.
«Мемлекеттік ынталандыру шаралары Бизнестің ыңғайласпа міндеттемелерін енгізуді, сондай-ақ өз міндеттемелерін сапасыз немесе уақтылы орындамағаны үшін жауапкершілікті көздейді. Яғни, кәсіпорындарға мынадай жауапкершілік жүктелетін болады: қолдау қаражатын қайтару, өтемақылар мен айыппұл өсімпұлдарын төлеу. Сонымен қатар, бәсекеге қабілеттілікті арттыру туралы келісім жасасу арқылы аралас ынталандыру пакетін алу мүмкіндігі көзделеді. Бұл бизнеске ұзақ мерзімді перспективада өндірістік қызметті жоспарлауға мүмкіндік береді», — деді ҚР Президенті жанындағы Орталық коммуникациялар қызметінде өткен онлайн-баспасөз мәслихатында Лаура Садықова.
