ҚР премьер-министрі Асқар Мамин Қазақстан Республикасындағы төтенше жағдайды қамтамасыз етуге жауапты мемлекеттік комиссияның кезекті отырысын өткізді, деп хабарлайды zakon.kz ақпарат арнасы.
Бейнеконференция байланысы форматында өткен отырыс барысында мемлекеттік комиссияның мүшелері карантиндік режим жағдайында жұмыс істеуге рұқсат етілетін Нұр-Сұлтан және Алматы кәсіпорындарының тізбесін бекітті.
Нұр-Сұлтанда өнеркәсіп кәсіпорындарына, құрылыс және жол-құрылыс салаларының компанияларына, сондай-ақ құрылыс материалдарын сататын ірі дүкендерге жұмыс істеуге рұқсат берді.
Сонымен қатар, елордада көлік, химиялық тазалау, автокөлік бөлшектерін сататын дүкендер, автосалондар, көлік жуу, ТҚС және ауыл шаруашылығы мақсатындағы компаниялар жұмыс істей алады.
Алматыда құрылыс және жол-құрылыс салалары компаниялары, сондай-ақ өнеркәсіп кәсіпорындары мен құрылыс материалдары базарлары өз қызметін жүргізе алады.
Оңтүстік астанада алдын ала жазбалар бойынша нотариустарға, Халыққа қызмет көрсету орталығына жұмыс істеуге рұқсат етіледі, алайда онда тек кәсіпкерлерге қызмет көрсететін болады.
Министрлер кабинетінің басшысы өз кезегінде Нұр-Сұлтан мен Алматы әкімдері Алтай Көлгінов пен Бақытжан Сағынтаевқа карантин режимі жағдайында жұмыс істеуге рұқсат етілген нысандарда санитарлық нормалардың сақталуын бақылауды қамтамасыз етуді тапсырды.
Сурет: zakon.kz
