2021 жылғы 4 наурызда ҚР Премьер-министрі Асқар Мамин ҚР Президенті жанындағы экономикалық өсуді қалпына келтіру жөніндегі мемлекеттік комиссияның отырысын өткізді. Жаңа экономикалық шындық жағдайында іскерлік белсенділікті ынталандыру мәселелері қаралды, деп zakon.kz хабарлайды.
Ұлттық экономика министрі Әсет Ирғалиев, «Атамекен» ҰКП Басқарма Төрағасы Абылай Мырзахметов, ҚР Қаржы нарығын реттеу және дамыту агенттігінің төрағасы Мәдина Әбілқасымова, Премьер-Министрдің бірінші орынбасары Әлихан Смайылов баяндама жасады. 2020 жылдан бастап ұлттық экономикадағы қалпына келтіру серпінін қамтамасыз ету мақсатында жұмыспен қамтуға жәрдемдесуді, кәсіпкерлік қызметті жандандыруды, цифрландыруды, АӨК әлеуетін ашуды, сондай-ақ тұрғын үй-коммуналдық, көлік, әлеуметтік және сауда инфрақұрылымын дамытуды көздейтін дағдарысқа қарсы шаралардың бірнеше пакеті қабылданды.
2020 жылы COVID-19 пандемиясының салдарынан экономиканың ең көп зардап шеккен салаларының бірі шағын және орта бизнес болды. Осыған байланысты, ағымдағы жылы «Атамекен» ҰКП 50 мыңнан астам кәсіпкерге қосымша қолдау шараларына қажеттілік тұрғысынан сауалнама жүргізді.
Сауалнама нәтижелерінің негізінде 4 бағыт: бизнеске жүктемені азайту, қаржыландыруға, сұраныс нарықтарына және сапалы адам ресурстарына қолжетімділікті кеңейту бойынша 24 шарадан тұратын қосымша пакет қалыптастырылды.
Жаңа шаралар пакеті ағымдағы жылғы 26 ақпанда Мемлекет Басшысы Қасым-Жомарт Тоқаевтың төрағалығымен реформалар жөніндегі Жоғары Кеңес шеңберінде қаралды.
Шаралар кешені мыналарды қамтиды:
экономиканың зардап шеккен салаларындағы ШОБ субъектілерінің ЭҚЖЖ тізбесін 2021 жылғы 1 маусымға дейін жеңілдікті шарттармен қайта қаржыландыру үшін 29-дан 174-ке дейін кеңейту,
зардап шеккен ШОБ субъектілерін Мемлекеттік мүлік объектілері және квазимемлекеттік сектор мүлкі бойынша жалдау төлемдерін есептеуден босатуды 2021 жылғы 1 шілдеге дейін ұзарту,
мүлік салығын төлеуден босатуды ағымдағы жылдың соңына дейін ұзарту,
кәсіпкерлік субъектілері жұмыскерлерінің жұмыс берушіден алынған қорғау құралдары түріндегі кірістерін ЖТС-дан босату,
мемлекеттік органдар мен квазимемлекеттік сектор субъектілерінің бастамасы бойынша заңды тұлғалар мен жеке кәсіпкерлердің банкроттығына мораторийді 2021 жылғы 1 шілдеге дейін ұзарту,
отандық тауар өндірушілердің Мемлекеттік сатып алуға қолжетімділігін арттыру,
«Даму «КДҚ» АҚ кепілдік беру құралын Ұлттық Банктің жеңілдікті кредит беру бағдарламасына тарату.
Қосымша шаралар пакеті озық қалпына келтіру серпінін және жаңа экономикалық шындық жағдайында іскерлік белсенділікті ынталандыратын экожүйені қалыптастыруды қамтамасыз етуге мүмкіндік береді. Тікелей іс-қимыл шаралары ағымдағы жылы ЖІӨ-нің 3% — ға өсуіне қол жеткізуге ықпал ететін болады, 3,3 млн-нан астам адам жұмыс істейтін 1,2 млн-нан астам кәсіпкерлік субъектілерін қолдауды қамтамасыз етеді.
Премьер-Министр Ұлттық экономика министрлігіне ағымдағы жылдың 12 наурызына дейін Парламент Мәжілісіне 25 наурызға дейін енгізу үшін қолданыстағы заңнамаға тиісті түзетулер топтамасын Үкіметке енгізуді тапсырды.
