Коронавирустық инфекция індеті және оған байланысты енгізілген карантиндік шектеулер шағын және орта бизнеске ауыр соққы берді. Маңғыстау облысының сауда және кәсіпкерлік басқармасы басшысының міндетін атқарушы Мұқанбетжан Көбеген зардап шеккен бизнеске мемлекет тарапынан қандай қолдау көрсетілетіні туралы айтты.
Ол Қазақстанда карантин енгізілуіне байланысты “Бизнестің жол картасы-2025” мемлекеттік бағдарламасына эпидемияның теріс салдарынан зардап шеккен шағын және орта бизнес субъектілерін қолдауға бағытталған түзетулер енгізілгенін мәлімдеді.
Өзгерістерге сәйкес, жоғары мөлшерлемемен несие төлейтін шағын және орта бизнес субъектілері мемлекеттік субсидиялар арқылы қарыз көлемін азайта алады.
Бұл көмекті алу үшін кәсіпкерлерге осы жылдың 30 қазанына дейін несие берген банктерге өтініш беру керек. Содан кейін “Даму” Қоры тізілімдер мен сауалнама-өтініштер негізінде субсидиялау мүмкіндігі туралы шешім қабылдайтын болады.
Алайда, егер кәсіпкердің 180 күннен астам мерзімі өткен берешегі бар екені анықталса, мемлекеттен қолдау алмайды.
