Қазақстан Республикасының Президенті Қасым-Жомарт Тоқаев бүгін еліміздің министрлер кабинетінің басшысы Асқар Маминмен кездесу өткізді, деп хабарлайды zakon.kz ақпарат ресурсы.
Кездесу Қазақстан көшбасшысын мемлекетіміздің әлеуметтік-экономикалық дамуына қатысты өзекті мәселелермен таныстыру мақсатында өтті.
Кездесу барысында Қасым-Жомарт Тоқаевқа оның шағын және орта бизнес субъектілеріне қолдау көрсету, азаматтарды жұмыспен қамтамасыз ету, егін жинау науқанын ұйымдастыру және жаңа оқу жылына дайындық бойынша берген тапсырмаларының орындалуы туралы баяндалды.
Сонымен қатар, кездесу аясында мемлекет басшысы еліміздегі қазіргі эпидемиологиялық жағдаймен, сондай-ақ індеттің таралуын болдырмау мақсатында енгізілген карантин шараларын жеңілдету жоспарымен танысты.
Премьер-Министрдің баяндамасын тыңдағаннан кейін,Тоқаев оған Үкіметтің алдағы қызметіне қатысты бірқатар нақты тапсырмалар берді.
Бұған дейін Қасым-Жомарт Тоқаев мемлекеттік қызмет істері агенттігінің төрағасы Анар Жайылғановаға келесі жылы президенттік жастар кадрлық резервіне тағы да конкурстық іріктеу өткізуді тапсырған болатын.
Сурет: akorda.kz
