Бүгін еліміздің президенті Қасым-Жомарт Тоқаевтың қаржы нарығын реттеу және дамыту агенттігінің басшысы Мәдина Әбілқасымовамен кездесуі өтті, деп хабарлайды мемлекет басшысының баспасөз қызметі.
Кездесуде Тоқаевқа биылғы жылы республикамыздың қаржы нарығының жай-күйі бойынша есеп ұсынылды. Сонымен қатар, Президентке тұтынушылық қарыздардың шамадан тыс өсуін болдырмауға және экономиканы несиелеуді ынталандыруға бағытталған қабылданған шаралардың тиімділігі туралы баяндалды.
Сондай-ақ Әбілқасымова зардап шеккен шағын және орта бизнес субъектілеріне қолдау көрсету мақсатында, Қазақстанда соңғы қарыз алушы үшін 6%-ға дейінгі пайыздық мөлшерлемелер субсидияланатынын айтты.
Сондай-ақ, ол Қазақстанның сақтандыру және қор нарығын жетілдіруге бағытталған заңнамалық бастамаларды дайындау бойынша жүргізіліп жатқан жұмыстар туралы баяндады.
Қасым-Жомарт Тоқаев өз кезегінде Мәдина Әбілқасымова басшылық ететін агенттіктің жұмысына оң баға беріп, республикамыздың қаржы нарығын дамыту бойынша одан әрі шаралар қабылдауды тапсырды.
Сурет: akorda.kz
