Қазақстан Президенті Қасым-Жомарт Тоқаев Қытай Халық Республикасына ресми сапары аясында Қытай көшбасшысы Си Цзиньпинмен кездесті. Бұл туралы мемлекет басшысының баспасөз қызметі хабарлады.
Қасым-Жомарт Тоқаев кездесу Қытай Халық Республикасының 70 жылдығы қарсаңында өтіп жатқанын атап өтті. Осыған байланысты ол қытай халқын осы мерейтойымен құттықтады.
Кездесу барысында Қасым-Жомарт Тоқаев пен Си Цзиньпин Ұлы Жібек жолы тұжырымдамасына қатысты мәселелерді талқылады.
Өз кезегінде Қытай басшысы Қазақстан Еуразияда үлкен ықпалы бар Орта Азиядағы ең ірі ел екенін айтты. Си Цзиньпин Қытай Қазақстан Республикасымен қарым-қатынасты жаңа деңгейге көтермек деп мәлімдеді.
«Бірінші басшы Назарбаевтың басшылығымен сіздердің елдеріңіз даму жолына шығып, ұлттық ерекшелікпен даму үлгісін көрсетті. Сіз өз бағытыңыздың үш принципін жарияладыңыз — сабақтастық, әділдік және прогрессивті. Жұмыс орындарын ашу, сыбайлас жемқорлыққа қарсы күрес, экономиканы дамыту және әлеуметтік қорғау деңгейін арттыру өз саясатыңыздың басымдықтары деп атадыңыз. Біздің қарым-қатынасымыздың 27 жылы ішінде біз күрделі жолдан өттік. Мен Сізбен бірге біздің елдері өзара көмек пен ынтымақтастық рухында мәңгілік стратегиялық әріптестігімізді дамытатын боламыз деп жариялауға дайынмын», — деді Қытай төрағасы.
Сурет: tengrinews.kz
