Бүгін төтенше жағдай режимін қамтамасыз ету жөніндегі мемлекеттік комиссияның отырысы өтті, оның барысында президент Қасым-Жомарт Тоқаев жастарды жұмысқа орналастыруға қатысты мәселені қозғады, деп хабарлайды мемлекет басшысының баспасөз қызметі.
Отырыс барысында Қасым-Жомарт Тоқаев Алматыға карантин режимін енгізу жастардың өңірлерге кетуіне себеп болғанына назар аударды.
БАҚ ақпараты бойынша, карантин режиміне байланысты Алматыдан жүз мыңнан астам адам кетті. Олар базар, қызмет көрсету және сауда саласындағы жұмысшылар және студенттер
Сондықтан мемлекет басшысы жұмыссыз жастарды су тасқынына қарсы, көктемгі егіс және құрылыс жұмыстарына тиісті еңбекақымен қатыстыру қажеттігін мәлімдеді.
Сонымен қатар, Қасым-Жомарт Тоқаев жастарды “Жұмыспен қамту жол картасы” бағдарламасы аясында жұмысқа орналастыруға болатынын атап өтті.
Отырыс аясында Президент жастар үшін қашықтықтан оқытуды ұйымдастыру керектігін айтты. Осыған байланысты Білім және мәдениет министрлігіне жастармен онлайн-жарыстар, дәрістер және басқа да оқыту іс-шараларын өткізу тапсырылды.
Сурет: Inform.kz
