Мемлекет басшысы Нұр-сұлтан қаласының әкімі Алтай Көлгіновты қабылдады, деп zakon.kz Ақордаға сілтеме жасай отырып хабарлайды.
Президентке елордадағы эпидемиологиялық жағдайды тұрақтандыру және вакцинациялау шаралары туралы баяндалды.
Қасым-Жомарт Тоқаев азаматтар коронавирусқа қарсы екпелерді тез арада алған жағдайда ғана олар қоғамдық орындарда бір-біріне қауіп төндірмейтінін, іскерлік белсенділік қалпына келетінін, қызметшілер жұмысқа шыға алатынын, жалпы халық қалыпты өмірге оралатынын атап өтті.
Президент әкімге азаматтарды уақтылы және жаппай вакцинациялауды ұйымдастыруды, эпидемиологиялық жағдайды бақылауды, халықтың денсаулығын сақтау бойынша басқа да шаралар қабылдауды тапсырды.
Мемлекет басшысына жаңа оқу орындарын салу арқылы үш ауысымды мектептер мәселесін шешу, сондай-ақ кезекте тұрған азаматтарды қолжетімді баспанамен қамтамасыз ету жөнінде мәлімет берілді.
Қасым-Жомарт Тоқаев Алтай Көлгіновке қаланы газдандыруға, инвестиция тартуға, Жұмыспен қамтудың Жол картасын тиімді іске асыруға, Шағын және орта бизнесті қолдауға қатысты тапсырмалар берді.
