Мәжіліс Қазақстан Республикасының дипломатиялық қызмет туралы Заңына қазақстандық дипломаттардың әлеуметтік қорғалуын арттыруға бағытталған түзетулерді мақұлдады.
Осылайша, дипломатиялық қызмет ардагерлерін әлеуметтік қорғауды арттыру мақсатында Заңда “Қазақстан Республикасы дипломатиялық қызметінің ардагері”деген ұғымды бекіту ұсынылады.
Бұл санатқа зейнеткерлік жасқа толған және кемінде 25 жыл жалпы еңбек өтілі бар, оның ішінде Қазақстанның дипломатиялық қызмет органдарында 15 жыл жұмыс істеген адамдар жатқызылатын болады. Бұл ретте төтенше және Өкілетті Елші немесе халықаралық ұйымдар жанындағы Тұрақты (өкілетті) өкіл қызметін атқарған не Төтенше және Өкілетті Елші дипломатиялық дәрежесі бар дипломатиялық қызмет ардагерлеріне Үкімет айқындайтын тәртіппен және мөлшерде ай сайын ақшалай төлем төленетін болады, — деп Қазақстан Сыртқы істер министрі Мұхтар Тілеуберді Мәжілістің жалпы отырысында хабарлады.
Әлемдік саясат пен экономика саласында іргелі және ғылыми-қолданбалы зерттеулер жүргізу үшін дипломатиялық қызмет органдарының жүйесіне ғылыми мекемелерді енгізу ұсынылады. Ұсынылып отырған жаңа енгізілімдер Сыртқы істер министрлігіне ведомстволық бағынысты сыртқы саяси зерттеулер институтының мәртебесін арттырады және оның қызметінің негізгі бағыттарын бекітуге мүмкіндік береді.
Сондай-ақ, “дипломатиялық почта” ұғымын енгізу және Үкіметке, СІМ-ге және басқа да мемлекеттік органдарға дипломатиялық почтаны жоспарлау, жасақтау, ресімдеу және жеткізуді қамтамасыз ету жөніндегі функцияларды беру ұсынылады.
Дипломатиялық қызметтің ерекшеліктерін назарға ала отырып, СІМ-ге жұмысқа түскісі келетін азаматтарға Шет тілін міндетті түрде меңгеру жөніндегі талап енгізіледі. Сондай — ақ, бұрын Қазақстан Республикасынан Халықаралық ұйымдарға жұмысқа жіберілген дипломатиялық қызмет персоналына конкурстық рәсімдерді өткізбей СІМ-ге жұмысқа орналасуға кепілдік беретін норма, – деп қосты сыртқы саясат ведомствосының басшысы.
Сурет: zakon.kz
