Әлеуметтік медициналық сақтандыру қоры Қазақстанда көрсетілетін медициналық қызметтердің сапасын тексерудің нәтижесі туралы айтты, деп хабарлайды «ҚазТАГ» жаңалықтар ресурсы.
Қор өкілдерінің айтуынша, 2020 жылдың алты айында елімізде азаматтарға көрсетілген медициналық қызметтердің сапасы мен көлемі бойынша 460 мың түрлі кемшіліктер анықталған.
Анықталған кемшіліктер үшін республиканың медициналық ұйымдары алған айыппұлдың жалпы сомасы 4,6 миллиард теңгеден асты, бұл өткен жылдың көрсеткішінен үш есе көп.
Әлеуметтік медициналық сақтандыру қоры бұзушылықтар арасында қоса тіркеулер жиі кездесетінін атап өтті. Атап айтқанда, ағымдағы жылдың бірінші жартыжылдығында Қазақстанда нақты көрсетілмеген, бірақ ақпараттық жүйеге енгізілген 11607 медициналық қызмет анықталды. Олардың жалпы сомасы 75 миллион теңгеден асты.
Бұрынырақ қор қоса тіркеуге рұқсат берген медициналық мекемелерге медициналық қызмет құнының 300% мөлшерінде айыппұл салынатынын айтқан.
Сурет: kaztag.info
