Атқарушы билік басшысы Асқар Мамин осы жылдың қараша айында Қазақстан мен Ресейдің өңіраралық ынтымақтастық форумы өтетін Көкшетауда болды.
Форум екі бауырлас мемлекет басшылары Қасым-Жомарт Тоқаев пен Владимир Путиннің қатысуымен өтеді деп күтілуде. Іс-шараның басты тақырыбы – Экология және жасыл өсім саласындағы ынтымақтастық болады.
Форум өтетін күні әлі нақты айтылған жоқ. Алайда Омбы сауда-өнеркәсіп палатасының ресми порталында іс-шара 12-13 қарашада өтеді деп көрсетілген.
Асқар Мамин Көкшетауға сапары барысында алдағы өңіраралық ынтымақтастық Форумына дайындық барысын тексерді.
Сонымен қатар, Үкімет басшысы 300 төсектік жұқпалы аурулар ауруханасын, сондай-ақ жедел жәрдем көліктері мен Қазақстанда жасалған жылжымалы медициналық кешендерді аралады.
Премьер-министр Көкшетауға сапары аясында әлеуметтік, тұрғын үй және көлік инфрақұрылымы нысандары құрылысымен танысты.
Біздің еліміз бен Ресей арасындағы өңіраралық ынтымақтастықтың бірінші форумы 2003 жылы Омбыда өтті. Содан бері екі елдің Президенттері дәстүрлі түрде шекаралас аймақтардың бірінде кездесу өкізуде. Алайда, Ақмола облысы дәстүрден тыс жайт болды, өйткені, өздеріңіз білетіндей, ол Ресей Федерациясымен шектеспейді.
Сурет: primeminister.kz
