Қазақстанның Премьер-министрі Асқар Мамин жұмыс сапары аясында Қостанай облысына барып, оның өнеркәсіптік әлеуетімен танысты. Бұл туралы премьер-Министрдің баспасөз қызметі хабарлады.
Мамин Заречный кентінде орналасқан “Северный” шағын ауданы аумағындағы тұрғын үйлердің құрылысымен танысты. Құрылысқа “Арвис”, “Ақжан и мы”, “ОА Монтажник” компаниялары жауапты. “Нұрлы жер”бағдарламасы аясында жұмыстар жүргізілуде.
Сондай-ақ, Премьер-Министр Қостанай қаласының индустриалды аймағында болды. Бірлескен жобаларды жүзеге асыру туралы Қазақстан мен Ресей басшыларының қол қойған келісіміне байланысты Қостанай қаласында «Кировец» тракторлары шығарылады. Осы жылдың қазан айынан бастап мұнда жылына 700-ге жуық трактор жиналады.
Индустриялық аймаққа бару аясында Мамин “КамАЗ”автокөліктеріне арналған бөлшектер өндірісімен танысты.
Қостанай облысына жұмыс сапары барысында премьер-министр бірқатар жүйе құраушы кәсіпорындар мен инфрақұрылым нысандарын аралауды жоспарлап отыр. Сондай-ақ, Мамин ауыл шаруашылығы тауарларын өндірушілермен жиналыс өткізеді.
