Тұңғыш Президент Нұрсұлтан Назарбаев республикамыздың атқарушы билік басшысы Асқар Маминмен кездесті. Онда өткен жылғы Үкімет жұмысының нәтижелеріне ерекше назар аударылды, деп хабарлайды zakon.kz ақпараттық агенттігі.
Кездесу барысында Назарбаевқа коронавирус инфекциясымен күрес бойынша 2020 жылы қабылданған жұмыс нәтижелері баяндалды. Сондай-ақ, Елбасы елдегі эпидемиологиялық жағдаймен танысты. Соңғы мәліметтерге сәйкес, Қазақстанда коронавирус жұқтырудың 159819 жағдайы тіркелді. Бұл дерттен146789 адам емделді.
Сонымен қатар, Мамин 2020 жылдың қорытындысы бойынша негізгі капиталға салынған инвестициялар 17%-ды, ал жұмыссыздық деңгейі 5%-ды құрағанын хабарлады.
Назарбаев өз кезегінде Министрлер Кабинетінің қызметіне оң баға беріп, Қазақстан экономикасының тұрақтылығын сақтауға және стратегиялық даму бағдарламаларын іске асыруға бағытталған шаралардың дер кезінде қабылданғанын атап өтті.
Үкімет басшысы өз баяндамасында билік органдары мен қоғамдық институттардың үйлесімді іс-әрекеттері елімізде індеттің қатты өршуіне жол бермегенін атап өтті.
Сурет: zakon.kz
