Премьер Асқар Мамин ресейлік “Татнефть” мұнай компаниясының бас директоры Наил Магановпен кездесіп, Қарағанды облысында дөңгелек жасау зауытының құрылысын талқылады, деп хабарлайды Қазақстан Үкіметі басшысының баспасөз қызметі.
Қарағанды облысының әкімдігі мен “Татнефть компаниясы кәсіпорын құрылысы туралы меморандумға осы жылдың қыркүйек айының соңында қол қойыды. Құжатқа сәйкес, дөңгелек шығаратын зауыт Саранда салынады. Жобаны іске асыру үшін 111 миллиард теңге бағытталады.
Зауыт салынғаннан кейін, оның қуаттылығы жыл сайын 3 миллион автомобиль дөңгелектерін және автобустар мен коммерциялық техникаларға 500 мың дөңгелек шығаруға жетеді. Осы жобаны іске асыру өңірде мыңнан астам жаңа жұмыс орындарын құруға мүмкіндік береді. Кәсіпорынды 2022 жылы пайдалануға беру жоспарланып отыр.
Кездесу барысында Мамин мен Маханов осы жобаны іске асыру бойынша дайындық жұмыстарына ерекше назар аударды. Олар сондай-ақ зауыт құрылысының жоспар-кестесін қарастырды.
Асқар Мамин Саран қаласында дөңгелек жасау зауытын салу біздің республика үшін маңызды жоба болып табылатынын мәлімдеді, өйткені жаңа кәсіпорын ішкі нарықты өніммен қамтамасыз етуге мүмкіндік береді, сондай-ақ елдің экспорттық әлеуетін дамытуға ықпал етеді.
Сурет: primeminister.kz
