18 наурызда ҚР Премьер-министрі Асқар Мамин кәсіпкерлік мәселелері жөніндегі жобалық кеңсенің отырысын өткізді, деп zakon.kz primeminister.kz сілтеме жасай отырып хабарлайды.
Отырысқа «Атамекен» ҰКП Төралқа Төрағасы Тимур Құлыбаев, Үкімет мүшелері, өңірлердің әкімдері, «Самұрық-Қазына «ҰӘҚ» АҚ, даму институттарының, Қазақстан қаржыгерлер қауымдастығының, өңірлік кәсіпкерлер палаталарының басшылығы және т. б. қатысты.
Үкімет мақұлдаған кәсіпкерлікті мемлекеттік қолдау шаралары туралы Ұлттық экономика министрі Әсет Ерғалиев, бизнестің жүйелі сын-қатерлері, жеңілдікпен несие беру мәселелері, микроқаржы ұйымдары институттарын, әлеуметтік-кәсіпкерлік корпорацияларды дамыту мәселелері, өңірлердегі ШОБ — ты дамыту әлеуеті, мемлекеттік сатып алулардағы жергілікті қамту, «Самұрық-Қазына «ҰӘҚ» АҚ және жер қойнауын пайдаланушылардың сатып алулары туралы — «Атамекен» ҰКП Басқарма Төрағасы Абылай Мырзахметов, бәсекелестікті қорғау және дамыту агенттігінің төрағасы Серік Жұманғарин, сауда және интеграция министрі Бақыт Сұлтанов баяндады.
«Атамекен» ҰКП Төралқа Төрағасы Т.Құлыбаев 11-12 наурызда өткен бизнес өкілдерімен экономиканың неғұрлым зардап шеккен салаларында өткізілген қосымша кездесулердің қорытындысы бойынша кәсіпкерлікті дамытудың 59 жүйелі салалық мәселесі айқындалғанын атап өтті.
«Атамекен» ҰКП ұсынған мәліметтер негізінде премьер-министр мемлекеттік органдар мен ұйымдарға жеке секторды қолдаудың қосымша шараларын, оның ішінде ШОБ-тың несие етуге қолжетімділігін одан әрі кеңейту, бизнеске реттеушілік және фискалдық жүктемені төмендету, отандық өндірушілердің Мемлекеттік сатып алуларға, «Самұрық-Қазына «ҰӘҚ» АҚ-ның және оффтейк-келісімшарттарды қолдануды кеңейтуді қоса алғанда, жер қойнауын пайдаланушылардың қатысу әлеуетін дамыту арқылы қарауды тапсырды.
Пысықталатын шаралар шеңберінде өңірлерде ауыл шаруашылығы өнімін өндіру және қайта өңдеу шарттарындағы айырмашылықты ескере отырып, АӨК-де субсидиялау жүйесі жетілдіріледі, сондай-ақ ауыл шаруашылығы өндірушілері үшін қаржыландырудың қолжетімділігі артады.
Үкімет басшысы реттелетін сатып алулардағы жергілікті қамтуды бақылауды, өңірлердің экономикалық картасын уақтылы және сапалы толтыруды қамтамасыз етуді, отандық кәсіпорындардың өндірістік қуаттарын жүктеу мақсатында оларды паспорттауды аяқтауды және микроқаржы ұйымдарын құруды жеделдетуді тапсырды.
Біздің міндетіміз-бизнесті жүргізу үшін жағдайларды жетілдіру және кәсіпкерлік саласындағы өзекті мәселелерді жедел шешу, — деді А.Мамин.
2021 жылы «қарапайым заттар экономикасы», «БЖК – 2025», «еңбек», «жұмыспен қамтудың жол картасы» бағдарламалары және Ұлттық банктің айналым қаражатын толықтыруға кредиттеу бағдарламасы шеңберінде бизнесті қолдауға 703 млрд теңге көзделген.
«Қарапайым заттар экономикасы» жеңілдікті несие беру бағдарламасы бойынша 2019 жылғы желтоқсан мен 2021 жылғы наурыз аралығында 700,3 млрд теңгеге 2855 жоба мақұлданды, 556,5 млрд теңге сомасына 2273 жоба субсидияланды.
«БЖК – 2025» бағдарламасын іске асыруда оң динамика байқалады – қаңтар-ақпан айларында 88,2 млрд теңге сомасына 669 жоба субсидияланды, 2900 жоба кепілдендірілді.
