ҚР Премьер-министрі Асқар Мамин алдағы жылдары білім беру саласында жоспарланған бірқатар өзгерістерді атап өтті, деп хабарлайды “ҚазАқпарат” ХАА.
“Білім беру саласын дамыту мәселелерінің өзектілігі мен маңыздылығын атап өткім келеді. Бәсекеге қабілетті адами капиталды дамыту “білім экономикасына” көшудің негізгі факторы болып табылады. Сондықтан қоғамға әрдайым ерекше талаптар қойылып, білімге жіті назар аударылады”, – деді Асқар Мамин Үкімет отырысында.
Осыған байланысты, оның айтуынша, “Nur Otan” партиясының бағдарламасын іске асыру аясында білім беру мазмұнын жаңғырту, оның жаңа инфрақұрылымын құру, педагогтар мен білім алушыларды әлеуметтік қолдау бойынша нақты шаралар әзірленді.
“2024 жылға қарай педагогтардың жалақысы мен студенттердің стипендиясы 2 есеге артады. 800 жаңа мектеп салынып, 5 мың ауыл мектебі жаңғыртылатын болады. Колледждерде 9-сынып негізінде оқу толығымен тегін болады. 10 колледж бизнесті сенімгерлік басқаруға берілді. Бұл тәжірибені жалғастыру қажет”, – деп атап өтті Премьер-Министр. “Университеттердің білім беру бағдарламалары кәсіптік стандарттар негізінде 100% жаңартылады, Бұл түлектердің жұмысқа орналасу мүмкіндіктерін арттырады”, — деп толықтырды Үкімет басшысы.
