Қазақстан Премьер-министрі Асқар Мамин бүгін Орталық Азия мен АҚШ диалогын дамыту бойынша “С5+1” форматындағы отырысқа қатысу үшін Астанаға ресми сапармен келген АҚШ мемлекеттік хатшысының саяси мәселелер жөніндегі орынбасары Дэвид Хэйлмен кездесу өткізді. Бұл туралы премьер-министрдің баспасөз қызметі хабарлады.
Тараптар 2018 жылы Қазақстан Республикасының Тұңғыш Президенті Нұрсұлтан Назарбаев пен АҚШ президенті Дональд Трамп жасасқан келісімдердің орындалу маңыздылығын атап өтті.
Кездесу барысында тараптар екі мемлекет арасындағы сауда-экономикалық және инвестициялық қатынастарды дамытудың өзекті мәселелерін талқылады.
Хэйл Америка инвесторларын Қазақстан экономикасы өте қызықтыратынын мәлімдеді.
“Бізде экономикалық қарым-қатынастарымызды дамытуға зор әлеует бар. Сіздің сапарыңыз елдердің өзара іс-қимылын нығайтуға елеулі серпін беретініне сенімдімін”, – деп Асқар Мамин, энергетика, ауыл шаруашылығы, денсаулық сақтау, ақпараттық технологиялар, логистика, туризм, авиағарыштық өнеркәсіп салаларында елдердің өзара тиімді ынтымақтастығын тереңдету перспективаларын атап өтті.
Сурет: inform.kz
