Нұр-сұлтан қаласына дейін «Сарыарқа» магистральды газ құбырының құрылысы аяқталу сатысында. Бұл туралы ҚР Энергетика вице-министрі Мұрат Жүребеков мәлімдеді, бүл туралы ХАА «ҚазАқпарат»тілшісі хабарлайды.
Оның айтуынша, бүгінде жұмысқа 1 700 маман мен 1000 бірлік арнайы техника жұмылдырылған; 1061,3 км немесе газ құбырының желілік бөлігінің 100% дәнекерленген және төселген; 963 км немесе газ құбырының 91% сыналған.
«Сондай-ақ, 5 АГРС, газ өлшеу станциясы мен басқару пунктінің құрылысы бойынша жұмыстар жүргізілуде», – деді Мұрат Жүребеков Үкіметте өткен брифингте.
Монтаж жұмыстарының аяқталу дәрежесі: газ құбырлары-бұрулар бойынша және 5 АГРС – 96,5%; газ өлшеу станциясы бойынша – 91% құрайды.
Ведомствоның мәліметінше, гидравликалық сынауды осы жылдың 25 қарашасына дейін аяқтау жоспарланып отыр, ГАЖ (газ өлшеу станциялары) мен АГТС (автоматтандырылған газ тарату станциялары) дайындау осы жылдың 10 желтоқсанына дейін аяқталады, құбырішілік диагностика осы жылдың 20 желтоқсанына дейін, байланыс және автоматика (ТОБЖ мен СКАДА) жүйелері бойынша іске қосу-реттеу жұмыстары осы жылдың 25 желтоқсанына дейін аяқталады, газбен толтыру осы жылдың 30 желтоқсанында күтілуде.
«Жалпы, жұмыстар кесте бойынша жүріп жатыр және ағымдағы жылдың желтоқсанында магистральдық газ құбыры, 5 бірлік автоматтандырылған газ тарату станциясы, газ өлшеу станциясы мен басқару пункті бар барлық нысандардың құрылысы аяқталады. Газ құбырын пайдалануға қабылдау 2019 жылдың 31 желтоқсанына жоспарланған», – деді Мұрат Жүребеков.
