Маңғыстау облысы сайлау комиссиясының басшысы Асқар Рзаханов облыстан Сенат депутаттығына үміткерлерді іріктеудің жағдайы туралы айтты. Бұл туралы lada.kz ақпарат агенттігі жазады.
Оның айтуынша, бүгінгі таңда бес адам республика парламентінің жоғарғы палатасының депутаттығына үміткер ретінде өтініш берді. Олар: «Қаранжанбасмұнай» АҚ вице-президенті Сүйіндік Алдашев, «Маңғыстаумұнайгаз» АҚ Бас директорының орынбасары Шолпан Ілмұханбетова, «Азаматтарға арналған үкімет» облыстық филиалының басшысы Ербол Байжігіт, «Ақтау теңіз порты» еркін экономикалық аймағы» АҚ басшысы Бекбол Орынбасаров және «Кардиология және ішкі аурулар медициналық орталығы» ЖШС директоры Нұрлан Тілепов.
Олардың құжаттары тексерілгеннен кейін, аймақтың сайлау комиссиясы облыс атынан Қазақстан Сенаты депутаттығына үш үміткерді бекітіп, тіркеді. Олар: Нұрлан Тілепов, Ербол Байжігіт және Сүйіндік Алдашев. Бекбол Орынбасаров пен Шолпан Ілмұханбетованың кандидатуралары әлі тексерілуде.
Асқар Рзаханов күнтізбелік жоспарға сәйкес, облыстық сайлау комиссиясы Сенат депутаттығына кандидаттар ұсынуға өтінімдер қабылдауды әлі де жалғастыратынын атап өтті.
Бұған дейін Қазақстан Республикасының басшысы Қасым-Жомарт Тоқаев қол қойған жарлыққа сәйкес парламенттің жоғарғы палатасына депутаттар сайлауы ағымдағы жылдың 12 тамызында өтеді.
Еліміздің Орталық сайлау комиссиясының ақпараты бойынша, Сенатқа депутаттар сайлауын өткізуге республика бюджетінен 254,7 миллион теңге бөлінді.
Сурет: zakon.kz
