Маңғыстау облысының әкімі Серікбай Трұмов Қоғамдық кеңес отырысында өңірді дамыту жоспары туралы мәлімдеді. Бұл туралы облыстық әкімдіктің баспасөз қызметі хабарлады.
Отырыс барысында Жаңаөзен қаласын дамытудың кешенді жоспарына бірқатар өзгерістер енгізілді. Облыс әкімінің айтуынша, қала тұрғындарының тығыз орналасуына байланысты тұрғындардың бір бөлігін Ақтау қаласына көшіру жоспарланып отыр. Серікбай Трұмов қазір 388 отбасы қоныс аударатынын атап өтті.
Сондай-ақ, Маңғыстау облысының әкімі Ақтау қаласында жаппай қоныс аударуға байланысты 10 мың пәтер салу мәселесі қарастырылғанын айтты. Ол бұл үйлердің құрылысы қаланың 13 жаңа шағын ауданында жүзеге асырылатынын атап өтті.
“Өңірдің әлеуметтік-экономикалық дамуы және халықтың әлеуметтік жағдайын жақсарту бойынша жұмыстар жалғасады. Біз үкіметтік емес ұйымдармен және басқа да мекемелермен жергілікті атқарушы орган ретінде дағдарыстарға дер кезінде көңіл бөлу, жедел шешім қабылдау, өңірдегі экономикалық және саяси тұрақтылықты сақтау, халықтың әлеуметтік әл-ауқатын арттыру бойынша жұмыс істейтін боламыз”, – деді Трумов.
