Маңғыстау облысы ішкі саясат басқармасының басшысы Ержан Күмісқалиев аймақта шектеу шараларын күшейту жөнінде шешім қабылданғанын мәлімдеді. Бұл туралы «Қазақпарат» ақпарат агенттігі хабарлады.
Осыған орай, Ержан Күмісқалиевтің айтуынша, барлық ұйымдардың қызметкерлері қашықтықтан жұмыс форматына көшіріледі, сонымен қатар тек аса қажетті мамандар аптасына 1-2 рет жұмыс орындарына бара алады.
Сонымен қатар, өңірде қоғамдық көлік жұмысы уақытша тоқтатылады, сондай-ақ Ақтау мен Жаңаөзенде жеке автокөліктердің жүруіне шектеу енгізіледі. 06:00-ден 09:00-ге дейін және 18:00-ден 21:00-ге дейін жүруге рұқсат етіледі.
«Ақтау қаласы маңындағы елді мекендерде тұратын медициналық мекемелердің қызметкерлері бөлек тасымалданады», — деді Ержан Күмісқалиев.
Осындай шаралар Маңғыстау облысында коронавирус инфекциясының таралуын алдын алу және азаматтардың өмір қауіпсіздігін қамтамасыз ету үшін қолданылады.
Соңғы мәліметтерге сәйкес, Қазақстан Республикасында коронавирус инфекциясының 531 жағдайы тіркелді.
