Түркістан облысы басшысының орынбасары Сәкен Қалқамановтың айтуынша, Мақтаарал ауданында су тасқынынан қатты зардап шеккен адамдарды орналастыру үшін жаңа шағын ауданның құрылысы басталды. Бұл туралы “Қазақпарат” ақпарат агенттігі хабарлайды.
Жаңа шағын аудан Мырзакентте салынып жатыр, онда кейін су тасқынынан қатты зардап шеккен Жеңіс, Жаңатұрмыс және Достық кенттерінің тұрғындары тұратын болады.
“Мырзакент кентінде жаңа шағынаудан құрылысына арналған алаң дайындалып жатыр. Бұл жерде Мақтаарал ауданындағы су тасқыны кезінде су басқан үш елді мекеннің тұрғындары орналасады, 500 отбасы тұратын болады, мектеп, балабақша, фельдшерлік пункттер салынады”, – деді Сәкен Қалқаманов.
Бұған дейін осы мәселе бойынша мемлекет басшысы Қасым-Жомарт Тоқаев су тасқыны салдарынан зардап шеккен Мақтаарал ауданының барлық тұрғындары жаңа баспанамен қамтамасыз етілетінін немесе бұрынғы тұрғын үйлер толықтай жөнделіп, барлығы 100 мың теңгеден алатынын айтқан.
1 мамыр күні Өзбекстан Республикасында Сардоба су қоймасының бөгеті жарылып, Мақтарал ауданының коллекторлары суға толып, елді мекендерді су басқан.
