Мақтаарал ауданында су тасқыны салдарынан 620 тұрғын үй зардап шекті. Бұл туралы Түркістан облысы әкімінің баспасөз қызметі хабарлады.
Қазіргі уақытта техногендік сипаттағы төтенше жағдай жарияланған Мақтарал ауданында Жаңа-Тұрмыс, Жеңіс, Фирдоуси және Өргебас елді мекендері су астында қалды.
Халықты эвакуациялау үшін 22 эвакуациялық пункт дайындалды, су басу салдарынан зардап шеккен азаматтарды 120 дәрігер қадағалауда.
Осыған орай Жеңіс, Жаңа-Тұрмыс, Фирдоуси және Өргебас елді мекендерінде бақылау-өткізу пункттері құрылды. Мұны тұрғындардың қауіпсіздігін қамтамасыз ету үшін құқық қорғау органдарының қызметкерлері жасады.
Қазір Мақтаарал ауданындағы жағдай республикалық штабтың бақылауында, оны Қазақстан төтенше жағдайлар комитетінің басшысы Владимир Беккер басқарады.
Өзбекстандағы Сардоба су қоймасы бөгетінің бұзылуы нәтижесінде коллекторларға суға толып, Мақтаарал ауданындағы елді мекендерді су басты.
Өзбекстан Республикасындағы бөгеттің бұзылуы фактісі бойынша қылмыстық іс ашылды. Қазір Өзбекстан мемлекеттік қауіпсіздік қызметінің органдары қажетті тергеу шараларын жүргізуде.
