Қазақстан парламенті төменгі палатасының депутаттары «Педагог мәртебесі туралы» заң жобасын мақұлдады. Бұл туралы ҚР Парламенті Мәжілісінің баспасөз қызметі хабарлады.
Жоғарыда аталған заң жобасын халық қалаулыларына ұсына отырып, Қазақстан Білім және ғылым министрлігінің басшысы Асхат Аймағамбетов мұғалімдердің құқықтық мәртебесін және оларды әлеуметтік қорғау кепілдігін жақсартуға бағытталғанын түсіндірді.
Білім министрінің айтуынша, бұл заң жобасы мұғалімдердің еңбекақысын 25%-ға арттыруды және мұғалімдерді, міндеттеріне жатпайтын жұмысқа тартқаны үшін, айыппұл салуды қарастырады.
Сонымен қатар, осы заң жобасына сәйкес мұғалімдерге сынып жетекшілігі мен оқушылардың дәптерлерін тексергені үшін қосымша төлемдер қарастырылған.
Сондай-ақ, бұл заң жобасында педагогикалық шеберлік, магистр дәрежесі үшін қосымша ақы, барлық мұғалімдер үшін демалыс кезеңін 56 күнтізбелік күнге дейін ұлғайту көзделген.
