ҚР Парламенті Мәжілісінің депутаттары “1994 жылғы 10 желтоқсандағы Қазақстан Республикасының Үкіметі мен Ресей Федерациясының Үкіметі арасындағы “Байқоңыр “кешенін жалға беру шартына өзгеріс енгізу туралы хаттаманы ратификациялау туралы” Қазақстан Республикасы Заңының жобасы бойынша қорытынды дайындау туралы” заң жобасын талқылауды бастады, деп “ҚазАқпарат”ХАА тілшісі хабарлайды.
Мәжілістің Халықаралық істер, қорғаныс және қауіпсіздік комитетінің төрағасы депутат Айгүл Құспан “1994 жылғы 10 желтоқсандағы Қазақстан Республикасының Үкіметі мен Ресей Федерациясының Үкіметі арасындағы “Байқоңыр” кешенін жалға беру шартына өзгеріс енгізу туралы” хаттама 2018 жылғы 9 қарашада Петропавл қаласында жасалғанын еске салды. “Хаттаманың мақсаты екі ел үкіметтері арасындағы Ресей тарапының “Байқоңыр” кешенін жалға алу мерзімін 2050 жылға дейін ұзарту жөніндегі шарттың төртінші бабына өзгеріс енгізу болып табылады. Комитет аталған заң жобасын жұмысқа қабылдауға дайын, ол бойынша 2021 жылғы 5 қазанға дейінгі мерзімде қорытынды дайындау қажет”, – деді Айгүл Құспан Мәжілістің жалпы отырысында. Естеріңізге сала кетейік, 2018 жылы Петропавлда Қазақстан мен Ресейдің XV аймақаралық ынтымақтастық форумында бірқатар құжаттарға қол қойылды.
