«Қазақпарат» ақпараттық агенттігі Қазақстан Республикасы Парламенті Мәжілісінің жалпы отырысында «Қазақстан Республикасының кейбір заңнамалық актілеріне атқарушылық іс жүргізу мәселелері бойынша өзгерістер мен толықтырулар енгізу туралы» заң жобасы қабылданғанын хабарлайды.
«Заң жобасының мақсаты — барлық тараптардың мүдделерін ескере отырып, атқарушылық құжаттардың сапалы және уақтылы орындалуын қамтамасыз ету. Атқарушылық іс жүргізудің тиімділігін арттыру үшін мынадай түзетулер енгізіледі. Біріншісі: Тараптар қаралатын істер бойынша, оның ішінде әлеуметтік санаттағы істер де өндіріп алу ақшасын сот орындаушысының ағымдағы шотына уақытша аударады, ал бұл шот оқшаулануы мүмкін. Осыдан шағымдар саны артып, әлеуметтік шиеленіс туындайды. Енді мұндай шоттарды бұғаттау жүргізілмейді. Екінші: мемлекеттік еңбек инспекторының республикаға өндіріп төлеу туралы нұсқамаларыны атқарушылық құжатты мәртебесі берілді.Үшіншісі: Қазақстан аумағында «Астана» халықаралық қаржы орталығының соты берген атқару парақтарын орындау жеке сот орындаушыларына жүктелетін болады. Төртінші: сот актілерінің орындалуын арттыруға бағытталған атқарушылық іс жүргізудің жекелеген рәсімдерін регламенттеу және жақсарту. Бесінші: атқарушылық іс жүргізуде мәжбүрлеп өндіріп алуды қамтамасыз ету және шектеу шараларын жүйелеу және сәйкестендіру. Сондықтан сот шешімдерін сот орындаушыларының өңірлік палаталарына беру ұсынылады. Онымен жеке сот орындаушысы мен өндіріп алушы арасындағы өзара әрекет тәртібі нақтыланады. Алтыншы: атқарушылық іс жүргізу процесінде автоматтандыру жүйелерін қолданудың нормативтік негіздерін жетілдіру. Жетінші: жеке сот орындаушыларының қызметін жүзеге асыру жолында кедергілерді, яғни лицензиаттар үшін белгіленген жас шегі алып тастау. Бұл Елбасының Жастар жылының ашылу салтанатында жастарды жұмысқа орналастыру шаралары туралы тапсырмасына сәйкес келеді. Сегізінші: жеке сот орындаушыларының қызметін бақылау шараларын жетілдіру және олардың жауапкершілігін күшейту», – деді депутат Асылбек Смағұлов.
Мәжіліс депутаты Алысбек Смағұлов жаңа өзгерістер өз жұмысын тоқтатқан жеке сот орындаушыларының қаражатын пайдаланудың алдын алады деп санайды.
Сонымен қатар, Смағұлов жаңа енгізілімдер сот орындаушылары институтының серпінді дамуына, сондай-ақ республика азаматтарының құқықтарын толық қорғауға бағытталғанын атап өтті.
Сурет: 24.kz
